رغم قوة و سيطرة الميكروباص علي الشارع المصري الا انه ليه اعداء . النهاردة نتكلم عن العدو الاول .. اللي هو الشرطة.أمناء الشرطة و الضباط من اكتر كوابيس سواقين الميكروباص , بعض الاوقات فعلا السواقين يصعبوا عليك . لأن ساعات تحس ان الشرطة بترخم عليهم لمجرد الرخامة . المشكلة الكبيرة في الميكروباص ان اللي بيحصل دلوقتي ان اي حد معاه فلوس ممكن يشتري ميكروباص و يشغل اي حد سواق عليه . فبقي عادي انك تلاقي ناس مجرمين و سوابق اللي سايقين غير طبعا الاطفال اللي ساعات بيبقوا سايقين الميكروباص و هما اقل من 18 سنة . الكلام ده بيبان جدا من اهتمام السواق بالعربية . السواقين اصحاب العربية بيبقي في اهتمام اكتر بالعربية و سواقة احسن .
سواقين الميكروباص اكتر ناس بتتبهدل من من الشرطة و عادي جدا ان امين شرطة يمثل و يذل اي سواق ميكروباص و الطبيعي اساسا ان السواق يبقي ماشي من غير رخصة سواقة و لا رخصة عربية .
مرة كنت راكب ميكروباص اقاليم و فجأة لاقينا لجنة و بتاع 4 ميكروباصات و كام تاكسي واقفين و لقيت امين شرطة بيوقف الميكروباص و ياخد الرخص , رغم اني ماشوفتش السواق غلطان في حاجة . المهم شوية و لاقيت السواق عمال يسب و يلعن و نزل من العربية . شوية و رجع ساق العربية و مشي برضه عمال يسب و يلعن . واحد سأله "في ايه يا اسطي ؟" . رد عليه الاسطي : " الاتاوه يا بيه .. اصل دلوقتي الموسم " . اللي فهمناه من السواق . ان في موسم الشرطة لازم تعمل عدد معين من مخالفات المرور . طبعا علشان ييجي علي اصحاب الملاكي ممكن يلطش في حد مهم . فبيجوا علي سواقين الميكروباص و التاكسي .يطلعوا منهم المعلوم و شكراا.
مش عايز الناس تضايق من سواقين الميكروباص قوي . اعرفوا بس ان في اللي بيقدر يرخم عليهم . المشكلة بقي مين اللي يقدر يرخم علي اللي بيرخم علي سواق ميكروباص ؟؟؟؟؟؟؟؟؟؟؟؟؟
0 تعليقات:
Post a Comment