النهاردة الكلام كله عن الاغاني .. مينفعش نتكلم عن الميكروباص و ننسي الاغاني الشعبية .. و لما نتكلم عن الاغاني الشعبي الصح ... طبعا ما نقصدش المستوي الهاي اللي زي حكيم و شعبان عبد الرحيم و أبو الليف ... لا خالص .. احنا بنتكلم عن مستوي تاني خالص ... اولا اللي بيتسمع دلوقتي اسمها مهرجانات مش اغاني.. المهرجانات عبارة عن ايه ؟؟
اولا في واحد اسمه النبطشي .. ده بيطلع في اول الاغنية و يقعد يتكلم عن المطرب حاجة بتاع 10 دقايق كدة و يحسسك ان عبد الحليم وُلد من جديد .. مع مطرب الاغنية الشعبية التحتية و الفوقية و مطرب التليفزيون و السينما و المسرح و الاذاعة و البوتاجاز مع برنز الشرابية و القلعة و مكاوي ............ طبعا غير السلامات اللي شغالة و احلي سلام للمعلم ابو شهد و سلام لولاد الحاج حسنين حاحا و الاسطي بلية ......بس يا سيدي وتبدا بقي الاغنية , رتم واحد يبفضل شغال من اول الاغنية لاخرها .. الرتم ده حاجة زي تيت تيت تييييييييييييييت و يفضل الكلام يتحط علي الرتم ده ..و اقصد كلام فعلا بمعني ان مفيش اي غناء ...لا هو فعلا واحد بيتكلم .. و الكلام حكم فظيعة و زعل من الدنيا و كلام عن المخدرااات .الكوميدي طبعا انك اللي عمال تسمعه يكلمك عن المخدرات اساسا بيغني و هو ضارب و دماغه عالية ,من الحاجات اللي تلاحظها في المهرجانات انه في الخلفية صوت الجماهير و هي بتصقف طبعا اعجابا من الروعة اللي بيقولها المطرب.و برضه تلاقي النبطشي يطلع كله شوية يقول كلمة ( يالهوووي - العب - قولوووووه - ولععتتتت) .
طبعا لاني معنديش اخر الاخبار عن الاغاني اللي مكسرة الميكروباصات دلوقتي .. استعنت بصديق لسه بيركب مكروباز ... قاللي ان ( بيجو و و اورتيجا و اشرف مزيكا و عادل ابو الدهب ) عاملين احلي شغل .
كان نفسي احطلكم شوية اغاني بس بصراحة خايف الناس متدخلش المدونة تاني .
كان نفسي احطلكم شوية اغاني بس بصراحة خايف الناس متدخلش المدونة تاني .
2 تعليقات:
Very Nice Article
كميه اغاني الي سمعتها وانا راكبه ميكروباصات
لا تعدي ولاتحصي في كل احزان
لدرجه انك هاتعيط وفي كل
سلامات زي ما قلت
موضوع حـلو
Post a Comment