انواع الميكروباص

النهاردة نتكلم عن انواع و فئات الميكروباص ... في ناس كتير فاكرة الميكروباص هو الميكروباص التويوتا الشيك اللي بيروح الحي العاشر أو مدينة السلام  , الحقيقة ان انواع الميكروباص كتيرة قوي و مختلفة هحاول اجمعها في الموضوع ده . و هرتبها علي حسب الحجم من الكبير الي الصغير :

1- الميكروباص الاتوبيس : هو اكبر واحد فيهم ,و فيه شبة من الميني باص تلاقي في صفين كراسي علي اليمين و الشمال و في النص حته الناس توقف فيها , النوع ده بالنسبة للسواقين احسن نوع من ناحية المكسب لانه بيقدر يجمع فيه اكتر عدد من الزباين , بس بالنسبة للركاب اوحش نوع . لان مع السواقة الرائعة للسواق بتعاني الناس اللي واقفة في النص و كل شوية تقع علي الناس اللي قاعدة . الميكروباص الاتوبيس تلاقيه كتير في شارع بورسعيد

2- الميكروباص المشهوووور : ده طبعا الميكروباص التويوتا اللي كلنا عارفينه و كتير مننا ركبه مش محتاج لشرح . الحاجات المميزة فيه ان الكراسي القلابة و "اكنبة الورانية اللي بتشيل 4 يا باشمهندس مش 3 ".السواقين بيحبوا النوع ده علشان احسن في الجري و الغرز . و النوع بنللاقيه في كل حته , ناقص ينزلنا في الحنفية .

3- الميكروباص الترامكو : النوع ده باعتبره انه النوع المرعب للعربيات الملاكي ..لان اي لمسه منه ممكن تجيبلك ربع العربية ... و والميكروباص ما يحصلوش حاجة ... واضح من تصميم الميكروباص ده انه مصري 100 % .. لان ببساطة مفيهوش اي تصميم .. مكعب حديد و فيه شوية كراسي .. تلاقيه كتير قوي الميكروباص ده في المسلة و المطرية .

4- الشبه ميكروباص : ده هو هو الميكروباص الترامكو مع فرق بسيط , انه مفيهوش فوانيس و لا ازاز .. و مش كل الكراسي موجودة .. ده تلاقيه في الحتت الشعبية قوي .. و غالبا مشواره بيبقي شارعين رايح جاي , بس الميكروباص بيلاقي منافسة جامدة مع الميكروباص نص نقل نمرة 5 و التوك توك .

5- الميكروباص النص نقل : ده ميكروباص اساسه نص نقل بس اتحطله خيمة كدة وفيها صفين كراسي . المنافسة جامدة جدا بينه و بين الشبة ميكروباص .

6- ميكروباص المحافظات : ده ميكروباص غريب و غامض . ده متلاقيهوش في القاهرة , موجود في المحافظات بس . شكله بيبقي غريب و بيدخن و ساعات تلاقيه علي الطريق الزراعي تايه و غالبا بيبقي موديل الستينات  . الغريب انه بيبقي عليه علامة مرسيدس !!

7 - الميني ميكروباص : ده ميكروباص نونو كدة مشواره بيبقي شارع رايح جاي .  بيشيل 6 ركاب . الناس اللي ساكنة في الهرم بيشوفوه كتير . و برضه لاقيته في العجمي .